Nina Wong 專訪：《Echoes of Love》的音樂故事

Joelion Keung
1月29日
讀畢需時 5 分鐘

已更新：2月3日

專訪｜《Echoes of Love》音樂會：探索 Mendelssohn 的情感世界

訪問者：Joelion Keung (Founder of JoMusic Management)

受訪者：Nina Wong Sin-i（ANIMA Ensemble 音樂總監）

關於音樂會的整體主題

Q1: 這次音樂會的主題是《Echoes of Love》，為什麼選擇了這樣的主題？它與 Mendelssohn 的弦樂四重奏有什麼關聯？

Nina：

講到今次音樂會嘅主題《Echoes of Love》，其實我哋選擇呢個主題係因為音樂本身就係一種充滿愛同正能量嘅藝術形式，係一個可以同人分享情感嘅媒介。而今次特別揀咗 Felix Mendelssohn 嘅兩首弦樂四重奏作品。透過呢兩首作品，我哋可以見到佢點樣透過音樂詮釋愛，無論係親情、友情或者其他形式嘅愛，都喺音樂中得到咁豐富嘅表達。所以，《Echoes of Love》呢個主題，正正係想帶出愛同情感喺音樂中嘅迴響。

Q2: 在這場音樂會中，您希望觀眾能夠感受到怎樣的情感或故事？

Nina：

喺今次音樂會中，我希望觀眾可以感受到古典音樂其實離我哋嘅生活好近，並唔係一種遙不可及嘅藝術形式。我希望大家能夠帶住自己日常生活嘅想像，或者曾經經歷過嘅故事，去代入呢啲音樂之中，從而喺音樂入面找到屬於自己嘅情感共鳴同故事。每個人嘅感受都會唔一樣，而呢種多樣性正正係音樂最美妙嘅地方。

關於 Mendelssohn 的弦樂四重奏

Q3： Mendelssohn 的弦樂四重奏第2號和第6號作為這次音樂會的核心曲目，它們有什麼特別之處？在風格與情感表達上，這兩部作品有哪些不同之處？它們如何互相呼應或形成對比？此外，第6號弦樂四重奏是 Mendelssohn 在姐姐 Fanny 去世後創作的，這樣的背景是否影響了你們對這部作品的詮釋方式？

Nina:

呢兩首作品其實相隔咗 20 年，《String Quartet No. 2》係 1827 年創作，而《String Quartet No. 6》則係 1847 年完成。喺情感同風格上，兩者有好大嘅唔同。

《No. 2》係 Mendelssohn 年輕時創作嘅作品，當時佢對愛情同感情充滿嚮往，作品中充滿青春同浪漫嘅氣息，風格上更加偏向古典主義（Classical），旋律輕快而優美。而《No. 6》就係佢最愛嘅家姐 Fanny Mendelssohn 突然離世後創作嘅，當中充滿咗對家姐深切嘅思念同悲痛，甚至融入咗家姐嘅音樂元素。呢首作品係佢生命中最後一部弦樂四重奏，情感深刻而複雜，風格上亦更加厚重同個人化。

對於我哋嚟講，演繹《No. 6》時，背景故事的確影響咗我哋嘅詮釋方式。我哋希望通過音樂，表達 Mendelssohn 嗰種無法言喻嘅痛楚同對家姐嘅懷念，並讓觀眾感受到音樂中蘊含嘅深層情感。

關於 ANIMA Quartet 的詮釋

Q4：在詮釋 Mendelssohn 的作品時，ANIMA Ensemble 是否融入了一些獨特的音樂語言或詮釋方式？

Nina:

喺詮釋呢兩首作品嘅時候，我哋會更加傾向於將自己所見過嘅、經歷過嘅，甚至係生離死別嗰種深刻情感，帶入到音樂之中。我哋希望通過呢啲作品去講述屬於我哋自己嘅故事，將自己嘅經歷同感受投射喺音樂入面，令到每一次演繹都充滿真摰嘅情感同獨特嘅生命力。

咁樣唔單止可以令音樂更有共鳴，亦可以讓觀眾感受到，呢啲作品其實係同我哋嘅生活緊密相連嘅。

Q5：你們在排練這兩首作品時，有沒有遇到什麼特別的挑戰？又是如何克服的？

Nina：

Mendelssohn 嘅作品一直俾人一種純粹、乾淨嘅感覺，充滿咗清晰嘅美感。喺《No. 2》中，因為風格較偏 Classical，所以我哋會用少啲 vibrato（震音），而更加多係依靠音色本身去表達情感。呢個時候，音準同音色嘅控制就變得非常重要，亦係一個好大嘅挑戰。

而《No. 6》則係一個完全唔同嘅世界。佢嘅情感深度同厚度要求我哋唔單止喺技術上突破，更需要真正體驗同理解 Mendelssohn 喪失至親嘅痛楚，然後喺音樂中表達出嚟。呢種情感嘅表達唔單靠 vibrato 或 dynamics，而係需要發自內心嘅共鳴。

另外，排練四重奏作品時，四位演奏者之間嘅互動係非常重要嘅。最大嘅挑戰係點樣喺尊重每個人嘅想法之餘，磨合大家嘅意見，拼湊出一個統一而完整嘅音樂形態。呢個過程係困難，但亦係最有意義嘅地方。

---

關於 ANIMA Quartet 與觀眾的連結

Q7：對於不熟悉 Mendelssohn 或弦樂四重奏的觀眾，您會推薦他們用什麼樣的心情來欣賞這場音樂會？

Nina:

對於唔係咁熟悉弦樂四重奏或者 Mendelssohn 嘅觀眾，其實可以用一種好放鬆嘅心態嚟聽，就好似去睇一場電影或者參加一場流行音樂會一樣。我希望大家可以用心去感受自己聽到嘅音樂，而唔需要帶住太多框架或者壓力。

其實，聽古典音樂唔需要好拘謹或者好嚴肅，更加唔需要覺得一定要先了解歷史背景或者作曲家嘅生平。音樂本身就係一種情感嘅交流，無論係古典音樂定係流行音樂，都可以用一個開放嘅心態嚟體驗，享受當下嘅每一刻。希望大家可以帶住呢種輕鬆嘅心情嚟參加，感受音樂帶俾你嘅獨特體驗！

關於 ANIMA Ensemble 的未來計劃

Q8：除了這次音樂會，ANIMA Ensemble 是否還有其他值得期待的演出或計劃？

Nina：

關於 ANIMA Ensemble，我哋嘅名字背後有住「飲水思源」嘅意思，代表住我哋希望喺音樂中承擔一份責任，將美好嘅事物繼續傳遞落去。

未來，我哋會繼續探索唔同音樂風格嘅可能性，例如喺 2月27號，我哋會喺香港科技大學舉行一場特別嘅音樂會，並將會同韓籍小提琴家 Ruda Lee 合作，一齊演奏 Piazzolla 嘅《四季》同埋 Vivaldi 嘅《四季》。呢個節目將巴洛克時期嘅經典同現代拉丁音樂融合，展現咗音樂跨越時代同文化嘅魅力。